المستحيل
تقدر تسحب منى بطاقتى الشخصية
عقد أيجار بيتى
بطاقة تموين رزى وزيتى وكبريتى
ماشى
تقدر تسحب كارت معاشى
تغير خط مواصلاتى
تهرسنى راكب أو ماشى
تلغى شهاداتى
تمنعنى امارس أبسط عاداتى
تشطب أسمى من كشف مكافاتى
تحرمنى من علاواتى
تمنعنى اخرج من بيتى
احكى للأطفال حكاياتى
تحرمنى من تلحين غنواتى
ترفدنى من شغلى
تبعدنى عن أهلى
تغربنى عن ذاتى
وتقدر أكثر أكثر
تتجبر تقفل فى وشى باب نقاباتى
تزور كشف انتخاباتى
تقطع نفسى ورا حق رغيف العيش
تغلى عليه الفول والطعمية
تقطع على النور والمية
وتفدر حتى تحرمنى من الحرية
تضيع أملى فى بكره
تقطع عشمى فى دلوقتى
لكن حسك عينك
عمرك ما ح تحرمنى من موهبتى
اللى ح أكمل بيها – غصبن عنك
اخر بيت فى قصيدتى

من نهنهات المشيب
يا القلب ده اللى عشقه عذبنى
تنه ورايا ما سابنى حتى شيبنى
جاى لى النهارده تغرغر – تشتكى – تعبان
يا جبان – نويت ع الهرب ونسيت تتوبنى
شوف دمى سايح يافالح ليه تعاتبنى

رحلات السندباد البلدى
سيادته بيزور أيرلندا
ح يجيب لنا هبرة خرفان
علشان ح نطبخ ع الكبدة
قرعن وبامية وبدنجان
ياعم طب زورنا ف طنبول
أو مرة عدى على مشتول
يمكن ترخص سعر الفول
والا نطول حق الدخان
فى كل يوم رحلة جديدة
أو جولة ميمونة سعيدة
وأحنا على سن حديدة
مرهونة على اخر فدان
واخد معاك جيش صحفيين
م المعطوبين والمخصيين
يبيعوا لنا ع النوته وبالدين
الكدب ملفوف فى السليوفان
تروح باريس تفتح عكا
و ف روما ح تأسس شركة
مع بوش أكيد داخلين عركة
نجيب درفها جنوب لبنان
وهمه يعجنوا ويلتوا
ويفبركوا مقالات يبكو ا
وان صيفوا كان أو يشتوا
بيبدلوا لون القمصان
ويعملولنا البحر طحين
ويعمكلوك ملك البحرين
الصلب فى كفوفك بيلين
وحمارتك العرجة رهوان
اذ كلمتك ع الكون ماشية
شمسك على الحكام غاشية
ومادام وراك اجدع حاشية
تبيع عيون فى سوق العميان
الخير وراه جاى لنا بالكوم
دا ليل نهار ما شفش النوم
وقع ولا خمسين مرسوم
يحولوا الفلح لألمان
احتار فؤادى من الأكاذيب
مع أن قلمى بألف أديب
وقلت أعمل م المحاسيب
يمكن شرار الحق يبان
وما نيش بشبشب ولا قبقاب
دانا ماشاء الله فنان

سألت عاملين وياك أيه
ياسعادة البيه
وحضرتك فرحان كده ليه
وكل شىء بتخبيه بان
لا مصر ليها طور ترعاه
ولا طحين باقى يا ولداه
وحلمنا اللى هلكنا وراه
صبح هتيكه فى خبر كان
بين الأمم أو فى الجامعة
بقينا نحكى ولا أبو لمعة
وصبحنا فى اخر دفعة
مالناش حساب ولا لينا مكان
فكن وارتاح واستهدى
ومد لك مده فمده
أصل الباروم أكل العده
ايه يعمل العيب فى العدمان

لت فى التطور الطبيعى
سارحة براغيت أباظة فى جناين الأدب
تمص ريق الورد ييبس حطب
مأزومة تكره هديل المبدعين الحى
ولا زى اللى اترهن أدبه بشروط النسب
ولو أن دود مشنا من نسل سوس الخشب
شاعر قصيدة واحدة منذ بدأها ما خلصتش
والتانى قصاص ظروفه الخايبة ما سمحتش
أما تالتهم مخضرم دفتر الأراشيف
حتى الرغيف معدته من الكره مهضمتش
فوهب حروفه لعتب أسياده ما قبلتش
دناوة النفس تكره عزة الأشعار
لذا تلاقى الندالة تليق عليك يا حمار
حلمك صغير قوى على قد موهبتك
نضف مرايتك يافالح راح تشوف صرصار
دى جتتك عفنت من سرقة الأفكار
خدمت باشا وظنيت صيته خدامك
خدعك سراب العدم دفنك فى أوهامك
وعشان ما تخسر دماغك سربوه منك
وفاتوك تبيع فنك المجروح لأصنامك
خيبتك فى شيبتك .. قفاك ما شفش قدامك

لحكمة من الصعب تفسيرها هربت هذه السطور من قصيده فى صفحة 10
دايسين بكعب العساكر
طايحين فى خلق الله
متلبشين ع الكراسى
من باب قانون لاشتباه

فى حب مصر
عشق الوطن يوهبنى حق الغضب
يعطينى شرف الأحتجاج والشغب
لما العقول الرزينة تهجر الساحة
تسود تفاهة القباحة بفن قلة أدب
ويبقى بكره احتمال خيبة فى غاية العجب !

نظرية الفن
الفن يعنى لاختلاف يا بهايم
ما احناش بقر وعيونا متغمية
داحنا البشر .. شيلناها مسئولية
مقامات حساباتها حدود بشرية
شجر الجوافة مش بيشبه بعضه
بيجيب ثمر حسب أما تسمح أرضه
أيش حال بقىى شجر الوطن والفكر
فيه اللى مومس واللى لساه بكر
واللى فى غيبوبة ونازل ذكر
واللى بينكر حادثة المنشية
ح تقول لى مين ؟ والا ح قولك أيه ؟
الفن برضه فيه منادى وبيه
ونجم ما يسواش ثلاثة جنية
وفيه حبيب أمه قليل تربية
هذى مبادىء نصف مفهومة
فيه فن شعبى وفن شغل حكومة
حس الغراب يفرق وحس البومة
عن حس ثومة أكيد وصوت عدوية
وفيه شاويش قالوا له يكتب شعر
علشان ما يبقى للعساكر سعر
ويزاحموا أفقرنا على الطبلية
ويطلعوا به للسما السابعة
ياخدوه من الكتاب على الجامعة
وفى الأذاعة ستوديو سته هدية
وعشان كده هتلاقى فيها وفيه
وكله ما يغركش يا ابن الأيه
كلمة كما غيم فى الشتا الصبحية
شبورة فوق الصورة غى وغية
لكنها ح تطير فى بعض ثوانى
أول ما شمس حقيقى تطلع تانى
تدفى صوت المبدع الأنسانى
هوه اللى يبقى .. قالتها أمى عليه
الكدب يا ابنى صوته دايما عالى

فن وسياسة وتمنه فى السوق غالى
لكن البضاعة الحلوة مستخفية
بس الحقيقة وحدها اللى بتفضل
علشان الحقيقة وان تكون نسبية
ضاعت أمم راحت ملوك وممالك
والخلق شافت ياما حروب ومهالك
وكله ساير للعدم والهالك
رغم الجنون ما يبقى غير الأعقل
ورغم كل القبح يبقى الأجمل
هيه الحقيقة من الأزل أبدية
على شرط تبقى حقيقة فنية

برقية ود للأبنودى

حزين النيل
ومالوش بخت فى أولاده , ويتألم
ماعادش بييجى فى معاده
وانا مش قادر أتكلم
كما الملهوف على بلاده
أقول يا مصر زاد فيكى المرار .. والموت
قدر قلبك عملتيها
عصافيرك كمن زى اللى بايدكى خنقتيها
سرقتى منها على عينك هدوء البال
خاصمتيها
وسلمتينا غصب وعمد للأحزان
( فؤاد)ك , شوق ( فؤاد ) يموت على سهوة
وما يكملش مشواره فى أحلامك
ويرحل فجأه راضى مسامح السجان
تلومينا كأنا كنا أصحابه زمان ومكان
وانتى مضفره همومه
تهدم راسخ البنيان
ويستفرد صلاح ها بنفسه
خوف من نفسه
من عارك .. فيهجرنا
عليه نشرب بخاطرنا لهب نارك
وحيد يقسى عليه حتى عتب داره
فتعصرى لوم فى كاساتنا
عسل يسكرنا بمرارة
وادى الأبنودى – يا مره
قلبتى عليه ولوعتيه
فى شيبته بعد عمرين تيه
صبابه والا سلمتيه
وتوهتيه بأسراره ف وطن مبلى بتجاره
متاهات الغرض تغويه
ببرق الوهم حايلتيه – ودلعتيه
يراهن بيك على السكر فى عنابك
يعاند فيك رضا عتابك
وخوف أصحابه وأصحابك
عليك وعليه هجرتى يا ملهمة بتنسية
وهو عمره ما قدر الهوى ينسية
لبد كما وشم فى أجنابك
مافارقشى عتب بابك
كأنه أعز أصحابك
يشاغب فيكى أحلامك , كما تشاغبيه
بحيرتك فيه كما حيرته فى أحوالك
قسيتى عليه
حرامك أيه ؟
حلالك ليه ؟
عمل لك أيه ؟
غير أنه حب ع الاخر
وغنى لك بلا أخر
وعاش وحده فى ملقف ريح
جراح مجده يقاسيكى
يشوف وعده ف ماسيكى
فرقى عليه
ماتخليش بيه
وقومى معايا نادى عليه
بشب شباب , على قدمية
ويرجع جاى
فى ايدى الناى
يفتح له القلوب صحبة
تزلزل حيطة الغربة
يرد الروح لنا تانى وطن فنان
على القهوة يدور بالشاى
مع الأشعار يجوز تانى
سماح نحلم بكان يا ما كان
وكنا زمان طيور حرة ونيل أنسان

عكاز تسول


عايزين زعيم يا مصر
محتاجين زعيم
طاهر رقيق الحس أشبه بالنسيم
قلبه سليم
كما صباح شتوى جديد
غسله المطر
يدرك بحس الفقرا مكمن الخطر
زى الشجر
مادد جذوره ف قلب طمى الطين
برئ من النميمة والتحيز الذميم
غنى عن الخديعة ولانحياز
وغية التلسين
مستغنى عن شريعة التخوين
صريح وصادق يفرز الجديد من القديم
ويخلص القديم من القديم
يرفض صريخ الضعف
حسرة المستضعفين
يشوف حنان النسانية
ف رقة الياسمسن
وفى نداوة زهرة الجوافة
حلاوة زهرة البرسيم
وفى الايدين الخشنة روعة
زهرة العرق على الجبين
عايزين زعيم بحق مش شبه
مش صدفة حط واشتبه علينا كالبقر
عايزين زعيم عز الصبا – نفر
مش لجل يحكم فينا يحكمنا قدر
سنين ورا سنين ورا سنين
عايزين زعيم
يييلم شمل اللى قتلهم الحنين
ويشد حيل اللى كوتهم الهزيمة
واللى دفنهم الهديم
يقيم ميزان العدل فينا يسعد الحزين
ويشد حيل المظلومين
ويأسس للأصول اصول
يفرق ما بين ظلام الجهل والعقول
بين الحروف الميتين على السطور
وفى الكتب
وبينها خضرا فى الصدور
عايزين زعيم مش لجل يملكنا قرون ورا قرون
لكن عشان يجلى معالمنا
ببلسم الفنون
والعلم خالى من الخبل وم الظنون

يزيح غبار صدا السنين
عن حر معدن شعبنا الأصيل
ياخد بايد المكبوبين ع الأرغفة
والضايعين ع الارصفة
والتايهين فى زحمة الحوارى
وقسوة الميادين
عايزين زعيم يا مصر
محتاجين زعيم
يحل حبل المشنقة
العقدة ضاقت على رقابنا
والحسرة عاصرة قلوبنا عصر
والعصر فاتنا فى مواتنا قهر
والحكم عفن فى حياتنا غدر
والزعما – كل الزعما صارو بالشبه
يتوالدوا زى العته فاقو كل حصر
نسيوا وصايا ابن النديم
واشتد بيهم ضهر كل قصر
فاتوا الوطن على الرصيف – هديم
يمضغ رغيف ابنه اليتيم
اللى ضناه حلمه بزعيم
يطلع به من ليله الغشيم – لنصر

معادلة صعبة
دايما تتكلم عنى
تعلن حبك موتك فيه
تنطق اسمى فى حنية
تلعن ام الحرامية اللى سرقونى
تكشف نوع البشوات اللى احتقرونى
والضباط اللى هرسونى
كافة مقالاتك عنى
تحضر كل المؤتمرات – بدلا منى
وعلى الشاشات تبتسم لى تطمنى
وانا مش طايلك

نفسى .. اقابلك
اتشكمرلك
يا اديب يا امير .. يا مثقف
نفسى اتشرف
واسلم بايديه عليك
لكن خايف
علشان عارف ان انا مش قدك
انا فسل هفية
ملهى على ام عينية
باحسبها بالخطوة وبالمليم
عايش فى الضلمة
مرعوب من وصل النور
وانت ليلاتى منور
فى الفضائيات

والارضيات والمحور ودريم
محموق بتدافع عنا يا مظاليم
ياعظيم انت يا ابو قلب ابيض وسليم
بس اسمح لى يا حكيم - لا مؤاخذة
ازاى انت عارفنى وعارف
ان الزمن العرص قارفنى
وشبك الفقر عافقنى وشانقنى
والقهر كاسر ضهرى خانقنى
والعوزة حوالين بعضى بتلفلفنى
على اكل العيش بتشحتفنى
والاسعار نارها بتحرقنى
وكل ده من غير ما تشوفنى
فاعمل معروف لا تخذلنى صدقنى
فكر مرة وتعالى قابلنى
وحياة امى وامك لو اعرف سكة لك أجيلك
بس الأجمل
تيجى منك
ذاك لانك فين ما ح تبص أكيد ح تشوفنى
مشموط على سلم عربيه
مصلوب فى طابور الفرن ئاو الجمعية
مخطوف فى عرابية تراحيل
متدبس فى قضية
معجون جوه ميكروباصات أمبابه أو السبتية
او فى كافة استقبالات المستشفيات الحكومية
مدووش فى اسواق الكانتو
بيفاصلم فيه
ملخوم
مش عارف اعدى الشارع وسط العربيات
مكسور النفس فى جامع
بيوزع ع الخلق عيدية
مكروش لجل الحق طبق الفول والطعمية
مطحون فى عيد الكحك
مسلوخ فى عيد اللحمة
متبحتر بينات لأعياد
الرسمية والدينية والشعبية
مدبوح قدام اولادى
المحتاجين لدروس خصوصية
مذلول قدام الكتب – ايها مكتب –
فى اى ادارة من ادارات القهر
ولم الفردة الحكومية
شفت ازاى سهلة – صدقنى –
خطوة .. ضرورية والا مش راح تلحقنى
انا ع الاخر .. قهر الدنيا محصل دقنى
روحى ف مناخيرى
من اول يوم فى الشهر بتطلع زرازيرى
وعلى اخر يوم منه بتبقى رجلى والقبر
ح اموت من غيرك
وأنت لا مؤاخذه ح تتوه من غيرى

سهرة ثورية فى الأوبرا

الست حميدة اليسارية
عملت متعهدة فنية
سابت المواويل و
وغناوى النيل
قهر وتراحيل
زجابت مارسيل للتغطية
والخبرة العبرة تقول لك أيه ؟
طول عمر الفن تكالنا عليه
ح تخش الوبرا معانا يا بيه
و ح نديلك تذكرة بجنية
ورغيف وعليه سكالوب بانيه
واشبع يا حبيبى ما تقرفناش
ضيعنا شبابنا ورحنا بلاش
دلوقتى بيعلا بيت النتاش
الثورة دخلت فى الأنعاش
ح نخش كمان دورة محلى
و الحزب يفوز بالتزكية
مبروك افرحوا زقططوا يا عيال
خبرة أجيال وتاريخ ونضال
وخلاص ما بقاش فلح وعمال
دلوقتى العركة مقال بمقال
وصورنا بتطلع فى الجرنال
تفرحوا بيها صبيان وبنات
وعواف ع الجبهة الوطنية
ح تقوللى غطيان ورياح مواويل
والقللى وشبرا وميت سلسيل
وامام وسخام والاسطى خليل
يا ابو دم تقيل يا رزيل يا سئيل
شريطكم سف ف غفلة ليل
ولا عاد جماهير ولا طين ولا تيل
داست غناويكو حوافر الخيل
والأحلام قلبت عالمية
على مية ونص
اتلحلح بص
احنا الواجهة ومعانا البوص
والست اللى زمان كانت نص
صبحت تامر وتقيس وتقص
وان كان الأمر ما يستغناش
وما فيش ولا حاجة بقت ببلاش
سوا كلتها عيش والا جلاش
تلزمنا اللمسة الفنية
وما دام فيه قعدة
ضرورى نرص
سوا كنت جهول
او واخد كورس
مين غيره مرسيل
يكسبها ونص ؟
يحبكها بدندنة يسارية ؟
ليلة حلوة - هه ؟
والكل ح يقبض كاش
و ح يعترفوا حتى الأوباش
الأوبرا نبضت ثورية

عهر السلطة قديم وتاريخى وله تقاويم قوانين ودساتير
الا فى العصر البطيخى اللى عمل من القمع خبير

العشوائيين
لا فيه حدود لخريطة
ولا خطوط لاتجاه
مافيش مدى للمسافة
ولا شطوط للمياة
زى اللى جنوا جنونهم
حين جف نبع الباه
لا همه طايقين هدومهم
ولا حسوا مر الاه
بالكذب ضايع صيامهم
بالغش سرقوا الزكاة
نسيوا ان فيه جايه اخرة
فكسروا نفس الحياة
غرقوا ف بحور الغواية
ناسيين وصايا الاله
فيزعقوا فى التلاوة
متشنجين فى الصلاة
مع ان كلن بيغنى
فيهم على ليلاه
والدنيا على مد ايديهم
طمع فى مين كان حداه
لو مره وقفوا فى أشارة
أكلوا حقوق المشاة

الديك الشركسى
ديك الشراكسة العايق الجربوع
يدن يوماتى فى غير مواعيدة
ما ينكسفشى وان انقطع قيده
انه يشوشر تانى ع الموضوع
انا رحت اشكى لحضرة القاضى
ومعايا حجة طول سبع ورقات
وبقى لى عند الباب سبع سنوات
والعسكرى يقول لى ما هوش فاضى
ياعم ياللى حاكمها بالقوانين
مره ف حياتك قول لهم عنى
لو انسى اصلى الناس تروح منى
ولا حد يشفع لى فى يوم الدين
امر الشراكسة الديك ما يدنشى
الا اما غصب نكع له المعلوم
من انه بالع غيطى من كام يوم
وسادد ودانة لجل ما انطقشى
ديك الشراكسة القاضى والمأمور
والعسكرى ومعاون التصاريح
داس بالبيادة ف قلبى نمت جريح
باحلم فى يوم ح ادن واهد السور

كلام من القلب
يا حسرتك من قدرتك ع الاعتذار للغير
وغيتك تظلم مع الغير روحك
غلطة سواك تلاقى لها ميت تبرير
وغلطتك لو سهو تدمى جروحك
عايش ضحية لغباوة حضرتك يا سمير
منذ البداية هواك بيهد طموحك
عدو نفسك بلا حجة ولا تفسير
لا صمت نصفك ولا هون عليك بوحك

تخاريف ليلية

نحن فى زمن الخرافات الألكترونية
والا ما الذى يجعل الفيلسوف العالم
يفشى اسماء رفاقة فى الخلية السرية
ولا يفكر فد شد سحاب بنطاله المبتل
فى كل مره يفاجئة سلس افكارة اللعين
وذكرياته المشوشة
زارنى أبى فى النوم الليلة الماضية
عاتبنى غاضبا
كيف تركتهم يسقطون ميت سلسيل
من خريطة الوطن

أكدت له اننى ما زلت أحبه
وافتقد عنجريب أمه ست العز ام علام
واتوق لساحة أبو الرايات
التى لم تعد ملعبا للأطفال
وأشتاق لملمس شعر البنت مديحة
الأكرت بما يكفى لأن اظل ثوريا
احن الى خبز أمى ليس سعدى يوسف

لكنه العراق
ليس القذافى

لكنه الجهل الذى ما زالت تجتره
النوق العصافير
منذ لم تعد العطايا مبررا للقوافى
فالنفط
لا يمكنه ترطيب نقير بذرة الفول
ولا يزيل دم طفل قتيل

امراة تبيع الخضار
على رصيف المدينة التى لا تحترم الخضرة
تريد أن تنقى الحندقون من كرات دمى
لكنها موقنة ان ابنتى ستقتلها
لو شمت رائحة كفيها الخشنتين
على طرف ملابسى الداخلية
ما الذى يبقى لى من كل هذه الألوان
سوى قصيدة تخجل ان تكتمل
وطعم اقراص الفيتامينات المغشوشة
أصبحت المبادئ والافكار فى عصرنا
كالسجائر الملغمة
يشعلها صاحب المزاج ويدخنها حتى ينشكح
ثم يلقى بها الى جامعى الأعقاب
فى معلمة